Kaun kehta hai ke maut aayi to marr JauNga

Ahmed Nadim Qasmi

Kaun kehta hai ki maut aayi to mar jauNga

MaiN to dariya huN samandar meiN utar jauNga

tera dar chhoḌ ke maiN aur kidhar jauNga

ghar meiN ghir jauNga sehraa meiN bikhar jauNga

tere pehlu se jo uTThuNga to mushkil ye hai

sirf ik shaḳhs ko pauNga jidhar jauNga

ab tere shehr meiN auNga musafir ki tarah

saaya-e-abr ki maanind guzar jauNga

tera paimaan-e-wafa raah ki deewar bana

varna socha tha ki jab chahuNga mar jauNga

charasazoN se alag hai mera mayaar ki maiN

zaḳhm khauNga to kuchh aur samwar jauNga

ab to ḳhurshid ko guzre hue sadiyaN guzriN

ab use DhoonDne maiN ta-ba-sehar jauNga

zindagi shamma ki manind jalata huN 'nadim'

bujh to jauNga magar subha to kar jauNga

احمد ندیم
قاسمی

کون کہتا ہے کہ موت آئی تو مر جاؤں گا

میں تو دریا ہوں سمندر میں اتر جاؤں گا

تیرا در چھوڑ کے میں اور کدھر جاؤں گا

گھر میں گھر جاؤں گا صحرا میں بکھر جاؤں گا

تیرے پہلو سے جو اٹھوں گا تو مشکل یہ ہے

صرف اک شخص کو پاؤں گا جدھر جاؤں گا

اب ترے شہر میں آؤں گا مسافر کی طرح

سایۂ ابر کی مانند گزر جاؤں گا

تیرا پیمان وفا راہ کی دیوار بنا

ورنہ سوچا تھا کہ جب چاہوں گا مر جاؤں گا

چارہ سازوں سے الگ ہے مرا معیار کہ میں

زخم کھاؤں گا تو کچھ اور سنور جاؤں گا

اب تو خورشید کو گزرے ہوئے صدیاں گزریں

اب اسے ڈھونڈنے میں تا بہ سحر جاؤں گا

زندگی شمع کی مانند جلاتا ہوں ندیمؔ

بجھ تو جاؤں گا مگر صبح تو کر جاؤں گا