Maine jo geet tere pyar ki khatir likhe | Fankaar by Majrooh Sultanpuri

Fankaar



maiñ ne jo giit tire pyaar kī ḳhātir likkhe

aaj un gītoñ ko bāzār meñ le aayā huuñ

aaj dukkān pe nīlām uThegā un kā

tū ne jin gītoñ pe rakhī thī mohabbat kī asaas

aaj chāñdī ke tarāzū meñ tulegī har chiiz

mere afkār mirī shā.irī merā ehsās

jo tirī zaat se mansūb the un gītoñ ko

muflisī jins banāne pe utar aa.ī hai

bhuuk tere ruḳh-e-rañgīñ ke fasānoñ ke evaz

chand ashiyā-e-zarūrat kī tamannā.ī hai

dekh is arsa-e-gah-e-mehnat-o-sarmāya meñ

mere naġhme bhī mire paas nahīñ rah sakte

tere jalve kisī zardār kī mīrās sahī

tere ḳhāke bhī mire paas nahīñ rah sakte

aaj un gītoñ ko bāzār meñ le aayā huuñ

maiñ ne jo giit tire pyaar kī ḳhātir likkhe

فن کار

میں نے جو گیت ترے پیار کی خاطر لکھے

آج ان گیتوں کو بازار میں لے آیا ہوں

آج دکان پہ نیلام اٹھے گا ان کا

تو نے جن گیتوں پہ رکھی تھی محبت کی اساس

آج چاندی کے ترازو میں تلے گی ہر چیز

میرے افکار مری شاعری میرا احساس

جو تری ذات سے منسوب تھے ان گیتوں کو

مفلسی جنس بنانے پہ اتر آئی ہے

بھوک تیرے رخ رنگیں کے فسانوں کے عوض

چند اشیائے ضرورت کی تمنائی ہے

دیکھ اس عرصہ گہہ محنت و سرمایہ میں

میرے نغمے بھی مرے پاس نہیں رہ سکتے

تیرے جلوے کسی زردار کی میراث سہی

تیرے خاکے بھی مرے پاس نہیں رہ سکتے

آج ان گیتوں کو بازار میں لے آیا ہوں

میں نے جو گیت ترے پیار کی خاطر لکھے